ആണത്തം

ആദ്യം താടിയും മീശയും വടിച്ചു.

ഏഴുദിവസം ഹോര്‍മോണ്‍ കുത്തിവെപ്പ്

മുടിയും മുലയും വളര്‍ന്നു.

മഷി നീട്ടി കണ്ണെഴുതി.

ശേഷം കവിതയെഴുതി അലസമായി വലിച്ചിട്ടു.

പ്രതീക്ഷിച്ച പോലെ

ഗുരുകാരണവന്മാരുടെ അനുഗ്രഹസ്പര്‍ശം

അഭിനന്ദികളുടെ ലാലാപ്രവാഹം

ഇപ്പോഴും അങ്ങിനെ തന്നെ..

പക്ഷെ രണ്ടു ദിവസമായി

ഒരു താടിക്കാരന്‍ രാവണന്‍ ചുറ്റി നടക്കുന്നു.

'എടാ...ഇതു നീയായിരുന്നോ !'

താടിക്കു പിന്നിലെ പെണ്‍രൂപം തിരിച്ചറിഞ്ഞു.

പഴയ ബ്ലോഗി സുഹൃത്ത്.

'ഇപ്പോള്‍ ഇതാണു രൂപം'

അവള്‍ താടി തടവി ചിരിച്ചു.

മൂലയില്‍ ആരും കാണാതെ അന്ത്യശ്വാസം വലിക്കുന്ന

തന്റെ  കവിതയുടെ നിറുകയില്‍ തലോടി അവള്‍ വീണ്ടും ചിരിച്ചു:

' പക്ഷെ ഈ ചാവിന്

ഒരാണത്തമുണ്ട് !'