അസംവാദം

അസംവാദം

ഒന്നാമൻ ‘അ’ എന്നാണ് പറഞ്ഞത്.

രണ്ടാമൻ സമ്മതിച്ചില്ല: ‘ആ’.

മൂന്നാമൾ പറഞ്ഞു : ‘ ‘ഇ’ ആണ് ശരി’ !

നാലാമൻ ‘ഈ’.

അഞ്ചാമൾ..

ആറാമൻ.....

വീണ്ടും ഊഴമെത്തിയപ്പോൾ

ഒന്നാമൻ ‘അ’ എന്ന കുറ്റിയിൽ തന്നെ കറങ്ങി.

അനന്തരം ഉച്ചയായി, വിശപ്പായി.

കുത്തരിച്ചോറ്

എട്ടുക്കൂട്ടം

പപ്പടം

പഴം

പായസം.

തർക്കികൾ ഒന്നടങ്കം

‘ഒ’ എന്ന് ഉരുളകൾ വായിലേക്കിട്ടു.

തർക്കം മടുത്തപ്പോൾ

‘ഓഓ’ എന്ന് കോട്ടുവായിട്ടു.

‘ങുർ‌‌ർ’ എന്ന് കിടന്നപായിൽ കൂർക്കം വലിച്ചു.

വെളുത്തപ്പോൾ

മുള്ളി,

കാട്ടമിട്ടു.

സംശയം തീർന്നു-

ഒക്കെയുമിപ്പോഴും മൃഗങ്ങൾ തന്നെ !